2026 Chapchar Kut thupui tur – “Zo nun ze mawi – Inremna”

28 Oct 2025: Vawiin khan Chapchar Kut 2026 Organising Committee chu an Chairman Pu Lalduhoma hovin Chief Minister Conference Hall-ah an thukhawm a. Kum 2026 Chapchar Kut hman dan tur an rel. Art & Culture Minister Pu C. Lalsawivunga leh member te an kal tha hle.

Prof.Lalsawmliana, Member Secretary chuan 2025 Kut hman dan Review Meeting kumin March thlaa neiha an lo sawiho tawh, kum 2026 kut hman dan tur ruahmanna te a tarlang hmasa a. Hapta khat chhung awh leh tura duan, hmun hran hrana programme buatsaih a, a nipui ber ni khat chauh Lammuala hman tura ruahman a ni. A hun thuah KTP Inkhawmpui lian nen a inrual thin avangin kum tharah chuan March hapta hnihnaa hman tawh tur a ni a, a lawmnapui ber chu March ni 13 ah Aizawl Sipai Lammual (ASL) ah hman tur a ni.

Vawiina thukhawm hian, Kutpa atan Pu Lalduhoma, Chief Minister a ruat a. A lawmna pui ber neihna hmun Aizawl Sipai Lammual buatsaih dan tur te, official pavilion leh stage siam dan tur te an rel a. Programme kimchang duangtu tur programme committee an din a, budget an siam a, Sponsorship Committee an din a, Post Souvenir Editorial Board an din a, thupui tur an thlang bawk. Kum 2026 kut thupui atan hian “Zo nun ze mawi – Inremna” tih chu thlan a ni. (DIPR)