MZU-ah Union Minister of State hovin kawng tlo zawk neih theih dan tur sawiho a ni dawn
20 June 2025: Nizan khan IRC Mid-Term Council Meeting hmang tura lokal, Indian Road Congress Office Bearers-te leh chinchinbu mite Hotel Regency, Aizawl-ah an inkawm.
IRC lam aiawhin Prof. Manoranjan Parida, President, IRC; VK Rajawat, DG(Roads) & Special Secretary, Ministry of Road Transport & Highways (MoRTH); Rahul Gupta, Secretary General, IRC leh Er H.Zoramliana, E-in-C, PWD leh IRC member ni bawk ten chanchinbu mite an hmachhawn a. IRC mawhphurhna, thuneihna leh tangkainate inhrilhriat a nih hnuah zawhna leh chhanna hun hman a ni.
Chanchinbu mite chuan Mizoram kawngte a tlo loh thin thu sawiin rawtna an neihte an thlen a, Prof. Manoranjan Parida, IRC President chuan CSIR – Central Road Research Institute atangin zir chiang tur Team an lo kal tur thu leh Council Meeting-ah pawh hmalak zui dan turte rel zui anih tur thu a sawi.
Er. H.Zoramliana, Engineer-in- Chief, Mizoram Public Work Department chuan MPWD hnathawh dante sawiin, Mizoram kawngpui atan chuan alkatra hmanga siam ai chuan cement, balu, rawra leh rod hmanga siam a tlo zawk tih hi MPWD-in a pawm dan leh a hmuh dan a ni a, IRC Council Meeting-ah pawh hian sawihona leh inrawnkhawmna hunah Mizoram kawngpui siam chungchanga MPWD-te tawnhriatte leh rawtnate pawh thlen a nih tur thu a sawi. PWD E-in-C chuan IRC Council Meeting thlen hi thil awlai lo tak a nih thu leh a thlengtu state ten an hlawkpui thin avangin tuna Mizoram-in a thleng tur pawh hi thil lawmawm tak a nih thu a sawi a, beiseina sang tak an neih thu a sawi a ni.
Indian Road Congress (IRC) hi India rama kawng kaihhnawiha hnathawktu Engineer leh pawl hrang hrang aiawh mi thiam inzawmkhawm pawl niin India rama kawng siam dana inkaihhruaina guidelines te, manual leh code chi hrang hrangte duangtu an ni.
Mizoram PWD chuan, 233rd IRC Mid-Term Council Meeting hi June 20 – 21, 2025 hian, Mizoram University, Aizawl-ah a thleng dawn a, Shri Harsh Malhotra, Union Minister of State for MORTH hovin kawng tha zawk leh tlo zawk neih theih dan turte sawiho a ni dawn a ni. (DIPR)
