15 July 2025: Kumin kum chanve chhungin Mizoramah ruihhlo vangin mi 33 an thi tawh a, heroin leh a kaihhnawih avanga thi an tam ber.
Excise & Narcotics Department-in a chhinchhiah danin, kumin January thla atanga tun thla July ni 2 thleng khan Mizoramah ruihhlo avangin mi 33 an thi tawh a, heng zinga mi 28 chu mipa niin, midang 5 chu hmeichhia an ni a, ruihhlo vanga thi te hi thalai kum 19 atanga kum 44 inkar an ni a, an zinga mi 9 te chu Heroin vanga thi an ni a, midang 24-te chu heroin leh ruihhlo dang tihpawlh vanga thi an ni thung a ni.
Excise & Narcotics Department-in Mizorama ruihhlo vanga thi a chhinchhiah tan kum 1984 atanga kumin thlengin Mizoramah ruihhlo vangin mi 1912 an thi tawh a, an zinga mi 1681-te chu mipa niin, 231-te chu hmeichhia an ni a, ruihhlo vanga thi tawh zingah kum 14 mi chu a naupang ber a, kum 58 chu a upa ber thung a ni.
Kum 2004 kha Mizorama ruihhlo vanga thi an tam ber tum niin mi 143, mipa 122 leh hmeichhia 21 an thi a, khatih hunlai khan Proxyvon chu an thihpui tam ber a ni a, kum 2015 chho atangin ruihhlo vanga thi zingah Heroin vanga thi an tam tan a. Kum 2005 hnulamah kum 2023 kha ruihhlo vanga thi an tam leh ber tum niin, mi 76 in ruihhlo vangin nunna an chan a ni.
Heroin leh Proxyvon bakah hian Alprazolam, Cataspa, Corazepam, khuh damdawi tui chi Cough Syrup, Dendrite, Diazepam, Ganja, Nitrosun, Pacitane (pepe), Parvon Spas, Peptica, Respira D, zu, codeine leh damdawi mum dang te an thihpui a ni. (AIR)
