16 July 2025: Mizoram Truck Owners’ Association General Secretary Pu Dina Tlau chuan kawng chhia avangin lirthei tlan tir aiin din tir a hlawk zawk tiin, an lirthei din tir an tam tawh thu a sawi.
Vawiina Akashvani-in a kawmnaah he thu hi sawiin Pu Dina Tlau chuan, Mizoram chak lakna kawngpui, Sairang leh Kawnpui inkar chu tha lai a awm meuh lo tih sawiin Sairang pelh hret, Buichali nena inkar chu a chhiat zual thu a sawi a. Lei pawp leh rod lawr thlenga a awm thu leh heng hian an lirthei ke a tih puah nasat thu a sawi a. Kawng chhia avanga traffic jam a nasat thin thu sawiin, zinga driver te chhuk thla chu nileng a tangin zanah an tlaivar thin thu leh a tuk tlaiah an chhuah theih tawk thin thu a sawi.
Kawng chhia avangin mi tam takin lirthei din tir a hlawk zawk an tih thu sawiin tam takin an din tir thu a sawi a. Kawng siam chu NHIDCL atangin a hminga mi tlem azawng an awm ve nia an hriat thu sawiin hna a sawt loh thu a sawi. Phai atanga bungraw lut tur pawh a luh hleihtheih loh thu a sawi a ni. Pu Dina Tlau chuan tun maiah chuan kawng siam hna thawktu NHIDCL an ngaihchan thu a sawi a, kartawp lamah a hmuna kal an tum thu sawiin an kalchilh chuan kawng siam hna pawh a sawt deuh thina an hriat thu a sawi a ni. (AIR)
