16 July 2025:  Vawiin khan, Information & Public Relation, Printing and Stationary Department changtu Minister Dr. Vanlalthlana chuan I&PR Conference Hall, Lianchhiari Run, Aizawlah, nikum leh kumina Mizoram Journalist Association (MJA) member boral ta te pualin lusun chhungte hnenah Sawrkar ralna thilpek(Ex-gratia ) a hlan.

He hunah hian khuallian IPR&PS Minister Dr. Vanlalthlana chuan lusun chhungte chu a tawrhpui tak zet thu sawiin, sawrkar ang pawhin Chanchinbumite pawimawhna leh ram leh hnam tana an hlutnate chu an hre reng tih vawng tlat turin a chah a ni.

MJA member boral, an puala sunna hun hman takte chu:

1. Pu Lalhmingmawia Pachuau, Pasaltha Daily Chanchinbu Editor, 21-11-2024 a boral

2. Pu Johan Lalhmunmawia, News Stringer, DDK, Lunglei, 02-12-2024 a boral

3. Pu H.Lalngaihawma, Hnehtu Daily Newspaper Editor, Aizawl, 23-03-2025.

4. Pu T.C.Lalmuankima, Correspondent, RNU, AIR, 23-12-2024.

Sawrkar chuan accredited Journalist boralte chu Rs.1,50,000 leh non-accredited Journalist boralte chu Rs.1,00,000/-in a ral a ni.

Hun hman hi IPR&PS Department Secretary Pi Betsy Zothanpari Sailo chuan a kaihruai a. MJA member boral ta te sunna pualin minute khat chhung ngawi renga dinga hun hman niin,ralna thilpek hlanna neih nghal a ni a. MJA President, Pu C.Lalrambuatsaiha hnen atangin MJA member boral ta te chanchin tawi ngaihthlak niin, Mitthi chhungte hnen atanga thusawi ngaihthlak a ni a. I&PR Director Pu C. Lalnunkima chuan lawmthu sawiin hun hman hi a khar a ni. (DIPR)