21 July 2025: Joint Civil Society of Mizoram (JCM) te chuan Mizoram chak lakluhna kawngpui NH 306 & 06 chhe mek siamthuai anih loh chuan hnatlangpui an ko dawn tih an sawi.
JCM hian vawiin khan Aizawl Press Club-ah thuthar thehdarhtute kawmin JCM Convener Dr Lalbiakmawia Ngente chuan tun hnai July ni 19, 2025 khan Kawnpui atanga Sairang National Highway 306 & 06 dinhmun an enfiah tih a sawi a, Kawnpui leh Sairang inkar kawngpui chhiat zia a takin a hmunah an hmuh thu sawiin he kawngpui pawimawh, km 40 vel, Mizoram ‘Life Line’ hi lirthei tan kal rual loh a nih thu a sawi a, Co-Convener Pu Lalrammawia pawhin khuar thuk tak tak leh tuitling te, nal tak takte a awm thu sawiin, lirthei tlu a awm nual bakah truck tam tak kal thei lovin ni tam tak chhung a awm tawh a, hei hian Mizoram mipui leh hnathawh te, sumdawngte ni tin nunphung a tibuai tih a sawi bawk.
JCM secretary Dr Vanlalsiama Chhangte chuan kawngchhe mek dinhmun atanga hmalak hmasak ngai nia an hriatte tarlangin Kawnpui leh Sairang inkar kawng chhiat em emna hmun chu a vaiin km 1 aia thui ni lo va an hriat thu leh, heng hmunte hi rang takin NHIDCL chu siam tura an phut thu a sawi. JCM Secretary chuan sorkar laipui, a bik takin Ministry of Road Transport & Highways (MoRTH) leh NHIDCL-te leh Mizoram Sorkar-te chu rang taka hma la turin an ngen tak meuh tih a sawi bawk a ni.
JCM hnuaia pawl hrang hrang: Mizoram Transformation Movement (MTM), Centre for Environment and Social Justice (CESJ), Mizoram First (MF), leh Citizens Alliance for Truth and Justice (CATAJ) te leh Mizoram Tippers Association, Mizoram Truck Drivers Association, All Mizoram Commercial Tippers Association, Fak Hlawh Lo Valrual YMA leh Village Council thenkhat aiawhte chuan July ni 19 khan Kawnpui leh Sairang inkar kawng hi an enfiah a ni. (DD)
