21 July 2025: Vawiin khan RB McCabe Hall, Aijal Club-ah Chief Minister Pu Lalduhoma chuan Mizo Diaspora Cell ten LushAITech nena tangkawpa an siam khawvel hmun hrang hranga cheng Mizote inthlunkhawmna tur internet portal thar Mizo DiasporaHub a hawng.
A hawnna thu a sawinaah Chief Minister chuan, Khawvel ram hrang hranga awm, Zofate nena inthlunzawmna tha neih hi kan rilruah a thi thei lo va. Kan sawrkar ve leh chu mi lam hna thawktu tur Mizo Diaspora Cell chu Chief Minister Office-ah kan din ta a, a tir lamah ram pawna tangkhang tanpui ngaite an theih ang angin an tanpui a. Inthlunkhawmna lam an buaipui leh a, chu an hmalakna rah duhawm tak chu vawiinah Mizo DiasporaHub tiin kan lo hawng thei ta a ni, a ti.
CM chuan, Welfare/Association ten tangkai takin he portal hi lo hmang ula, registration lo ti vek ang che u. Inhretawnin awm ila kan duh a, tanpui kan ngaihnaah kan thawk dun ang a, sawrkar thilte kan inhrilh hre bawk ang a. A bik takin an awmna rama harsatna tawk, sawrkar inrawlh a tulna thilah a tangkai zual ang, a ti.
An thawhrimna avangin Diaspora Cell leh sawrkar sum sen ngai lo va portal siamsaktu LushAITech te chungah lawmthu a sawi a ni.
Pu Vanlaldina Fanai, Chairman, Diaspora Cell chuan Diaspora Cell chu kum 2024 June ni 11-a din tan a nih thu a sawi a, tunah hian welfare/association tan registration kan hawng mek a, he mi zawh hian mimal registration kan hawng leh ang, a ti. He portal hmang hian miin a va vahchhuahna hnai vaia Mizo Welfare lo awm te awlsam takin a hre thei dawn a, an inkhawmna hmun te, an pawl hruaitute contact pawh a hre thei ang. AI hmanga thuam a ni a, zawhna pawh zawh theih a ni a, enge maw rikrum thila thu inthawnna tur SOS chenin dah a ni, a ti.
Portal hi play store leh apps store atanga download theih a ni a. Website atanga luh theih a ni bawk.
A hawnna inkhawmah hian Dr. Vanlalthlana, Minister, ICT, Pi Lalrinpuii, Minister, Social Welfare, Pu Lalnghinglova Hmar, Minister, LESDE bakah Adviser to CM te, officials te, tlawmngaipawl hruaitute, Diaspora Cell member te, LushAITech thawktute an tel a ni.
