22 July 2025: Vawiin khan Leitlangpui Music Festival (LMF) 2025 Working Committee chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah a ṭum khat nan an ṭhukhawm.
June ni 12, 2025-a Tourism Minister Pu Lalnghinglova Hmar hova LMF 2025 Organising Committee ṭhukhawmin a lo pawm tawh angin, Leitlangpui Music Festival 2025 hi November ni 13-15, 2025 (Ningani-Inrinni) chhungin a hmun ngai, Pukpui Kawmzawlah buatsaih leh tura ruahman a ni.
Kumin LMF 2025 atan Tourism Ministry aṭangin Rs Nuai 25 leh Mizoram sawrkar aṭangin Rs Nuai 25, a zavaiin Rs Nuai 50 hmuh beisei niin, sum hnar dang dap turin Tourism Director kaihhruai Sponsorship Committee din a ni bawk.
Working Committee ṭhutkhawmah hian Leitlangpui Music Festival hi hnam ziarang leh ro hlu chawi larna leh vawn ṭhatna bakah, ei bara hmasawnna atan leh khualzin tam zawk hip luhna tura ram pawn thleng pawha thawm nei tura ruahman leh beisei anih thu tarlan niin, mipuite pawhin inhawng tak leh neitu thinlung pu-a dawnsawn leh hman thiam a pawimawh thu tarlan a ni.
LMF 2024-ah Lungleia khualbuk leh sumdawng eng emaw zatin sum ṭhahnem tak an lak luh phah thu tarlan niin, member-te chuan sum leh pai lak luhna kawnga mipuite tana remchang awm chu hlu an tih thu leh ṭangkai lehzuala hman theih anih an beisei thu an sawi. (DIPR)
