23 July 2025: Vawiin chhun dar 12:00 khan District Child Protection Officer Lunglei, Pu David Zaitinvawra chuan a Office Chamber-ah MJA Lunglei member-te a kawm.
DCPO Pu Davida chuan an Department hnathawhna kawngah Chanchinbumite chu tanpuitu tha tak an ni tiin thawhhona tha neih a duh avanga MJA-te pawh lenga sawm anih thu a sawi a, an hnathawh langsar ber chu JJ Act hnuaiah naupang buaipui ngaite buaipui a ni, a ti. Naupangte venhimna kawngah Office-a thawktute chauhin kan thawk hneh lo va, Media mite leh tlawmngai Pawlte nen tha taka thawhho a tul hle a ni, a ti.
DCPO chuan an hmalakna thar sawiin kum 2023 July thla atang khan Child Line kaltlanga hna an thawh thu sawiin, Child Line kaltlang hian kum 2025 vawiin thlengin case 114 a awm a ti a, DCPU-in naupang case an neih tam ber chu rukruk case a ni, a ti bawk.
Children Home an neihte chu K.K Home, Bethel Centre, BCO Serkawn leh BCRC te a ni tih, DCPO tawiawmtu thawktu dangte chuan an sawi a. Home te hi Sawrkarin a chhawmdawl thin tih sawiin, zaa sawmkua hi Central-in a tum laiin zaa sawm chu State tum a ni a, Fund erawh an hmu thalo hle a, kuminah phei chuan an la hmuh loh avangin pawn lam atanga tanpuina an mamawh hle a ni, an ti.
Vawiina District Child Protection Officer Lunglei leh MJA Lungleite inkawmhonaah hian MJA Lunglei President Pu H.Lalthansanga pawhin DCPO leh thawktu dangte nen thawhhona tha tak neih zel an duh thu leh inthlahrung lova MJA-te an tangkai theihna turah engmah sawi hreh lo turin a ngen a ni.
