23 July 2025: Nimin tlai khan Lok Sabha MP Pu Richard Vanlalhmangaiha chuan National Highways and Infrastructure Development Corporation Limited (NHIDCL) Managing Director Dr.Krishan Kumar chu New Delhi-a a office-ah kawmin; Mizoram a NHIDCL kawng siam chungchanga harsatna hrang hrang an tawh dan te a sawipui.
Pu Richard-a chuan NHIDCL enkawl kawng NH-306 Vairengte – Sairang inkar kawng a chiat avanga Mizoramin harsatna an tawh nasat zia te a bikin, Sairang leh Kawnpui inkar a chhiat nasat zual avanga Commercial vehicles pawh an tlan ngam tawh loh thu te chipchiar takin Dr.Krishan Kumar chu a hrilh a.
NHIDCL Managing Director chuan kawng chhia chu pawi a tih thu sawiin Technical Director Amarendra Kumar pawh an hnathawhna hmuna hna chak zawk leh tluang zawka an thawh theih nan a enpui tura Mizoram lama a tirh nghal thu Pu Richard a hi a lo hrilh a ni. Dr.Krishan Kumar chuan Mizoram Chief Minister Pu Lalduhoma ngen angin Mizoram enkawltu Executive Director pawh a thar Adelbert Susungi an ruat nghal thu alo sawi bawk a, he kawng siam nan hian Rs Vaibelchhe 50 sanction anih tawh thu sawiin fur avanga an thawh chak theih loh thu te leh Sairang-Kawnpui inkar pawh thlakhat chhunga thawh zawh an tum thu a lo hrilh a ni.
Pu Richarda hian NHIDCL Managing Director hi an hnathawhna a hmun ngeia en turin Mizorama kal turin a sawm a, NHIDCL Managing Director pawhin remchang hmasa bera Mizoram kal a tum thu a hrilh.
