24 July 2025: Vawiin khan Assam Rifle ram chhuahsan hman zui dan tur ngaihtuahtu Advisory Committee te chu an Chairman Pu Lalduhoma, Chief Minister hovin an thukhawm.
Chairman chuan, sawrkarin a duh dana thutlukna a lo siam mai chu thaa a hriat loh avangin pawl hrang hrang aiawh telna Advisory Committee a din thu leh tel tur awm ang chu an tel kim thawkhata an hriat thu a sawi.
Meetingah hian Mizoram Synod atanga lehkha hmuh te, AR ram chhunga mimal ram nei court thubuaia lut mek (pending case) chungchang te, AMC, GPC Mizoram State Assembly, Health, P&E leh PHE Department atanga dilna lo lutte an pharh a.
Aizawl Civil Hospital Complex tihzauh nana Aizawl Police Station awmna hi hman a nih theih nan AR ram chhuahsanah hian Aizawl Police Station hi dah ni se tia Health Department dilna chu a thuphunga pawm (in principle) a ni a, zirchianna neih zui tur a ni.
Pu Lalmalsawma Pachuau, Secretary, UD & PA chuan Master Plan an ruahman chhin a sawifiah a. Culture & Nature Centre, khawvel khawpui changkang danga an lo neih thin ang ngaihtuah ran chunga an duan a nih thu a tarlang. A ram zawng zawng zatve aia tam (52.57%) chu hmun hring, mipuite tana len khaw thawn theihna turin an ruahman a, Advisory Committee hian an sawi ho va, a tul anga la sawi zui zel a ni ang. (DIPR)
