24 July 2025: Irrigation & Water Resources Department (I&WRD) Minister Pu PC.Vanlalruata chuan vawiin khan I&WRD hnuaia hmalakna atana Nghasih lui tui khuah theih dan tur ruahmanna dinhmun leh hmunhma te kal chilhin a enfiah.
Minister hi I&WRD hotute bakah, Agriculture & Farmers Welfare Department atang leh Lungleia PHED hotute leh party hruaitute’n an tawiawm a ni.
I&WRD Minister ruahmanna hnuaiah Department hotute chuan Lunglei khawpui tui harsatna leh kut hna thawktute tui mamawh phuhru thei tura ruahmanna duangin, kum 2050 thlenga tui mamawh zat tur chhut chhuah hnuah Nghasih lui tui khuah hmanga tui mamawh hnianghnar hmuh theih dan awmin an hria a ni.
Tui khuah hi tihhlawhtlin theih anih chuan helai ram vela kut hna thawktute huan lo rama tui lak atan bakah, Lunglei khawpui tui in tur lak nan te, sangha khawi nan te, tui hna siam nan te, tui chunga infiamna chi hrang hrang atan leh khualzin hipna tur hmun pawimawh atan te hman remchang tura ngaih a ni a. Chumi hmathlir nei chuan I&WRD hotute chuan ruahmanna siamin, Minister ho hian a taka kalpui leh tihhlawhtlin theih dan tur te an en ho a ni. (DIPR)
