29 July 2025: Vawiin khan Land Revenue & Settlement Department changtu Minister Pu B.Lalchhanzova chuan Directorate of Land Revenue & Settlement Conference Hall, Aizawlah, LR&S Department hnuaia e-RAM portal kaltlanga Digitally-signed ROR (LSC) hlanna hun khuallian niin a hmanpui.
Khuallian Pu B.Lalchhanzova chuan, tun hmaa LSC tia hriat than zawk ROR chu mipuite tana thil pawimawh tak tur, nakin thlenga Mizoram hmasawnna bung thar,hriat reng tawh tur a ni, a ti a. Ram chin chhinchhiahna te, ram chhiah pek te, ram lei leh hralhte kalphung buaithlak tak nia mipui thinlunga lo awm tawhte pawh, e-RAM portal leh Department hnuaia Tax Payment Portal-te mipuiin uar zawka an hman hunah chuan awlsam taka tih zung zung theih a ni ta chuan mipuite thinlung pawh a tha zawnga a thlak ngei a beisei thu sawiin, Mipui vantlang zingah e-RAM Portal hman tangkaina leh a pawimawhzia zau thei ang bera theh darhpui turin kalkhawmte a chah nghal a ni.
Vawiina Minister-in Digitally-signed ROR/LSC a hlante hi Pu Lalchhanhima, Tuithiang Veng leh Pu H.Lalsangzuala, Chaltlang vengte an ni.
Minister hian kumin February ni 19 khan e-RAM portal hi a taka hman tan turin a lo hawng tawh a. e-RAM portal hmang hian mipuiten awlsam zawk leh online-in ram teh, hming thlak, ram then leh dilna hrang hrang an theh luhte chu a hmasak dan indawt zela detailment siamin, hei hi empanelled surveyor-te’n lo tehin; portal kaltlang vek hian process leh a ni anga, Land recording fee leh a tul dangte tihfel hnuah diltute mobile phone-ah download mai theihin digitally-signed LSC/ROR hi pek chhuah thin a ni dawn a ni.
