30 July 2025: Vawiin hi Mizoram Baptist Kohhran hnuaia Fellowship Department lian ber Thalai Kristian Pawl (TKP) Day vawi 74-na anih angin zanin hian TKP Unit hrang hrangte chuan TKP Day pual hian hun an hmang dawn a, TKP Day vawi 74-na thupui atan “Danglam lo Ringtu” Jeremia 17:7- 8 thlan a ni.
TKP Day pual hian TKP Unit tam ber chuan tukin khan vantlang tana thil tha tiin, khawlai thenfai leh tanpui ngaite tanpui nan hun an hmang. Vawiin chhun lama TKP Day puala hun hman tum erawh hriat theih chinah an awm lova, zanin lamah TKP Day pual hian TKP Unit tin ten Biakin lamah Pathian biak inkhawm leh Fellowship-in hun an hmang thung dawn a, TKP Day thupui hmangin Pathian thuchah ngaihthlak a ni ang.
Tun dinhmunah BCM hnuaia Pastor bial 92-ah TKP Unit 447 awmin, member 50,364 an awm mek. TKP-te hian kumhnih dan zelah rampum huap inkhawmpui an nei thin a, kumin February thla chawhma lam khan Lunglawn Pastor bialah rampum huap inkhawmpui an nei a ni.
