
Sairang rel station World class-a siam dan tur sawi
31 July 2025: Vawiin khan Chief Minister Pu Lalduhoma chuan a office-ah Pu AK Chaudhary, General Manager, NF Railway (Construction) leh a thawhpuite a kawm a, Sairang Rel station hawn hun tur leh Mizoram chhim lama rel kawng kal zel tur chungchang a sawipui.
Sairang rel station hawng tur hian Chief Minister hian Prime Minister Pu Narendra Modi a sawm a. Prime Minister hi a rawn kal theih dawn chuan inbuatsaih a ngai a. A hawnna function neihna hmun tur te, Hortoki leh Mualkhang station a tlawhna atana Helicopter tumna tur lo siam lawk te, rel kawng a endikna atana special coach lo buatsaih te a tul tur thu an sawi a. A rang lama inbuatsaih turin Chief Minister hian General Manager hi chahin, an hmalakna enhona thla thar ni 19 a neih leh ni se, an ti.
Union Railways Minister-in a lo tiam tawh ang a, Sairang rel station chu World Class-a siam chhoh zui dan tur leh Rajdhani Express a rang lama tlantir nghal dan tur te pawh an sawi dun.
Chief Minister hian, Thenzawl chu Peace City atana siam tum anih thu leh Master Plan siam hna an tan mai tawh tur thusawiin, chhim lama rel kawng kal zel tur hian Thenzawl Peace City hi a daifem, hla vak lovah paltlang thei se, station hi hla lutuk lo se a duh thu a hrilh a.
Pu Chaudhary chuan, Thenzawl kianga kaltir an tum dan report chu kumin October thla vela hriattir hman a tum tur thu Chief Minister hi a hrilh a ni. (DIPR)