02 Aug 2025: Mizo Student’s Union Regnl Hqrs, Lunglei chuan thuchhuah siamin, Supreme Court-in Polytechnic ram neitu hnena pek tur, ramluah man Rs Nuai 88.14 chu chawlhkar 4 chhunga High Court-a thehlut turin Mizoram sorkar a hriattir chu lawmawm a tih thu an sawi.
Chutih laiin, High Court-a kal chhunzawm leh anih dawn vangin leh MPL building pawimawh tak tak 7-te kalh a la nih avangin zirna a la khaihlak chhunzawm zel a, hei hi MSU chuan pawi a ti takzet a ni, an ti. Building an kalh takte-ah hian an zirna atana pawimawh laboratory, workshop leh office file pawimawhte a awm avangin zirlaite an khawngaihthlak takzet a ni, an ti.
He an building kalhsakte atanga an mamawh zualpui lak chhuah anih theih nan leh zirna pangai an chhunzawm leh theih nan Mizoram Sorkar chu theihtawp chhuah turin a ngen tak meuh meuh tih an sawi.
