Skip links

Ngawrh lehzuala kawng siam hna thawh tum a ni

02 Aug 2025: Vawiin khan Home Minister Pu K.Sapdanga’n Sairang – Khamrang – Kawnpui inkar kawng (NH-6) siamthat hna kalpui mek chu a hmunah kalin a endik a; Minister hi Pu T.B.C Lalvenchhunga, Advisor to CM bakah PWD leh Police hotuten an tawiawm a. Kawnpui leh Khamrang khawtlang hruaitute, MTOA leh Driver Association hruaitute nen inbiakna neih niin hmalak zel dan tur rel ho a ni.

Home Minister chuan  Kawnpui leh Sairang inkar kawng tha lo avanga mipui leh lirthei khalhtute harsatna tawh mek chu pawi a tih thu sawiin, kawng siam that hna thawktu NHIDCL leh PWD-te hmalakna tichak tura khawtlang hruaitute, tlawmngai pawl, lirthei neitute leh lirthei khalhtute inpekna leh tawiawmnaah lawmthu sawiin, kawng chhia avanga Vairengte leh Sairang inkara tangkhang mekte chu a tawrhpui thu a sawi a, an ei leh in tur pawh Kolasib DC Office-in an lo ngaihtuah zel tur thu a sawi bawk.

Vawiina Home Minister hova ruahmanna an siam dan chuan  August 4-9 chhungin ngawrh lehzuala kawng siam hna hi thawh tum a ni a, he ni 5 chhung hian PWD leh NHIDCL ten an tha zawng zawng hmangin kawng siam hna an thawk ang. Lirthei tangkhang mekte chu Mizoram Police ruahmanna hnuaiah August ni 3 (Pathianni) ah chhuahtir vek tur niin, ke 14 nei (14-wheeler) chin chunglam erawh chu tlan phal a ni rih lo ang a, an bungraw phurh pawimawh leh hmanhmawhthlak chu truck te zawka transit tura hrilh an ni. Thawhtanni atanga nilaini (4-6 August) inkarah phei chuan lirthei eng chi mah tlan phal a ni dawn lo a, hetih chhung hian 407 chin hnuailam tan tlang kawngah (Kawnpui-Serkhan-Durtlang road) tlan theih a ni ang.

Kawnpui, Khamrang, Mualkhang leh Sairang YMA ten hnatlangin kawng siam hna hi an thawhpui dawn bawk a. Minister chuan hnatlanga thawk chhuakte chu lawmman pek an nih tur thu a sawi a ni.

Kawng thawmthat hna hi NHIDCL hnuaiah BR Goyal Infrastructure ten thawkin, Mizoram PWD chuan a tul apiangah khawl leh hmanruate nen an tanpui reng bawk a.  PWD atangin Er. Eddie C.Zothansanga, Superintending Engineer, Highway Circle-I, Executive Engineer – 2, SDO leh JE te’n a hmunah an riahchilh mek a ni. (DIPR)

Home
Account
Back