04 Aug 2025: Vawiin khan Mizoram Larsap, General Vijay Kumar Singh chuan A.H& Vety. Department Secretary Pu Lalsangliana leh hotu dangte chu Raj Bhavan-ah kawmin, vawk pul hri African Swine Fever (ASF) chungchanga Mizoram dinhmun bakah department hmalakna leh hmachhawp tlangpuite a sawipui.
Larsap chuan African Swine Fever-in Mizoramah kum 4 lai harsatna a thlen tawh thu sawiin, hemi avanga sum leh pai channa nasa tak thleng leh mipuite khawsak leh nunphunga nghawng nasa tak thlengte chu veiawm a tih thu a sawi a. Harsatna leh rawtna an thlente chu theihtawp chhuaha lo bawhzui sak a tum thu a sawi bawk.
Dr. Esther Lalzoliani, Dy. Director (DI&E) chuan Power Point Presentation hmangin ASF chungchang, Mizoram dinhmun leh pawimawh hrang hrangte a sawifiah a. Tarlan anih danin March ni 21, 2021 khan Lungsen khuaah Mizorama African Swine Fever (ASF) case hmasa ber report a ni a. August ni 3, 2025 thleng khan ASF avanga vawk thi zat 69,411 awmin, hrileng darh zel tur ven nana suat (culled) 52,194 a awm a. Chhungkua 11,424 te nghawngin, Rs vaibelchhe 982.16 hu vel chan tawh anga chhut a ni a. Sawrkar laipui Assistant to State for Control of Animal Disease leh State Sawrkar kaltlangin vawk suat compensation Rs Nuai 1451.915 sem chhuah tawh a ni a, heng bakah hian Mizoram DM&R Department kaltlangin vawk thi compensation Rs Nuai 477.08 pek chhuah a ni tawh bawk.
Vawiin meeting-ah hian AH& Vety. Department hotute chuan Mizoram chu ASF-in a chenchilh tlat tawh avangin, khuahkhirh turin hridanna (vaccination) kalpui chu hmalak theihna awm chhun a nih thu Larsap hi hrilhin, tun dinhmunah India ramah ASF vaccine a awm loh avangin a siam chhuaktu Vietnam atanga lakluh dan a awm em tih ngaihtuah a tul thu an thlen a. Sawrkar laipui atanga fund hmuh kawngah harsatna a awm avanga compensation duh anga pek theih a nih loh thu pawh an thlen bawk.
Mizoram chu Disease Diagnostic Laboratory tihchangtlunna tur, Pandemic fund project dawng tur phase 1 a state 14 thlan chhuah zing a a tel thu leh, he project hnuaiah hian NABL accreditation nei turin hmalak thuai tum a ni a. ASF avanga harsatna tawhte zirchiang turin National Institute of Veterinary Epidemiology and Disease Informatics (NIVEDI) Scientist/expert-te biak fel an nih tawh thu leh September-ah Mizoram an rawn tlawh hman beisei a nih thu tarlan a ni. (DIPR)
