05 Aug 2025: National Assessment and Accreditation Council (NAAC) in zirchianna tunhnaia a tihchhuaha Mizoram University (MZU) in A+Grade (CGPA 3.30) a hmuh thar lawmna, MZU Auditorium-a buatsaih chu vawiin khan Larsap General Vijay Kumar Singh, Chief Rector, MZU chuan khuallian niin a hmanpui a, MZU e-Office Portal a tlangzarh nghal bawk.
Larsap General Vijay Kumar Singh chuan MZU-in NAAC A+ Grade a hmu thar chu a lawmpui thu sawiin, University la naupang tak kum 2000 a din, 2001 a kalpui tan MZU in hun reilote chhunga hlawhtlinna hrang hrang a hmu leh India hmarchhak bakah ram puma zirna tha zinga chhiar tel a ni chu chhuanawm a tih thu a sawi a. NIRF-in India ram University tha zual a thlan chhuah top 100 zinga MZU a lang pha char char leh tunhnaia 77-na dinhmun a hauhte, Central University bik inelna IIRF tehnaah 15-na dinhmun a hauh phate chu chhuanawm a tih thu a sawi a. Hmasawnna tur tam tak a la awm thu leh endikna neih leh hunah tun aia result tha zawk neih ngei a beisei thu a sawi bawk.
Larsap chuan MZU in hmasawnna a hmuh hrang hrangte tarlangin, DRDO Industry-Academia Center of Excellence nei chhun a nite chu fakawm a tih thu a sawi a. Vohbikte tana nelawm leh leilung leh nungchate humhimna tha tak campus an neite chu lawmawm a tih thu sawiin, India ram hmun hrang hrang bakah ram dang 15 atanga zirlai 43 lai an nei chuan zirna tha tak a nih zia a lantir thu a sawi a ni.
MZU Vice Chancellor Prof. Dibakar Chandra Deka chuan hlawhtlinna nei tura tha thawktu zawng zawngte chungah lawmthu a sawi a. A+ grade chuan mawhphurhna nasa tak a kengtel tih sawiin, hnung tawlh lova A++ grade hmu ngei thei tura tanlakpuiah kalkhawmte a sawm a ni. (DIPR)
