09 Aug 2025: Aizawl District Bawrhsap Lalhriatpuia’n phalna nei lo tana tuialhthei zawrh chhuah khapna thupek a chhuah chuan zawm a hlawh lem lo va, kawngpui sira zuar thinte chuan ni dang ang bawkin an zawrh chhunzawm.
Vawiin chawhma lam khan Akashvani palai chuan Bawngkawn leh Durtlang Leitan inkar kawngpui a petrol zawrhna bakah Vanapa Hall kianga petrol zuar thinte a tlawh kual a, anni bakah hian Aizawl khawpui hmun thenkhatah chuan tuialhthei hi an la zuar chhuak reng a ni.
Aizawl DC chuan August ni 7, Zirtawpni khan thu chhuah siamin, mi tumahin Aizawl District huam chhungah phalna nei lovin Petrol leh Diesil an zuarin an hralh tur a ni lo, a ti a. Kangmei ti chhuak a, chhiatna thlen thei a nih avangin fimkhur a ngai tih sawiin, BNSS 2023 Section 163 tlawh chhanin khapna thupek hi a chhuah a, thupek hi thla hnih chhung awh tur niin thupek zawm lo chu dan hmanga hrem tur an ni ang.
(Kawng sira petrol zuar thenkhat hian Aizawl DC thupek hi an la hre lem lo va, thupek chhuah a ni tih hriate pawhin thla hnih chhung atan tih kha thla hnih hnua hman chauh tur emaw ti tawk pawh an awm bawk a, petrol an lak khawlsa te chu an la zuar chhunzawm a ni.) -AIR
