11 Aug 2025: Vawiin dar 11:00 Am khan ZPM Southern Hqrs Lunglei chuan Chhung Inkhawm neiin Pu Rodingliana Khiangte General Secretary, ZPM Southern Hqrs Lunglei chuan thu sawiin, Pu Vanlalliana Pachuau Secretary, ZPM Southern Hqrs Lunglei chuan a kaihruai.
Pu Rodingliana Khiangte General Secretary chuan State University dinna tur Aizawl hmun thlan anih dan leh a theih anga Party zawn atanga an chhuina leh an hmalakna sawiin, State University chu Lungleiah dah nise tih chu ZPM Southern Hqrs Lunglei ngaihdan anih thu leh Lunglei lama MLA-te pawhin theih tawpin hma an la niin a sawi.
State University chungchangah hian MNF Ministry khan Bill Draft siamin State Capital Aizawl hmuna awm turin alo tifel tawh Pu Rodingliana Khiangte chuan a ti a, State University hi Cluster Model a ruahman anih thu leh College awmsa te hmang tangkai turin Sorkar chuan a ruahman a, Administration Office bakah School of Studies pali (4) ruahman a ni a, a hming la tifel chiah lo mahse Zirna peng hrang hrang khaikhawm thei turin School of Humanities & Education, School of Social & Behaviour Science bakah School of Pure & Natural Sciences, School of Business & Commerce te kalpui tur a ni dawn tih sawiin, College awmsa hmang tangkaia Sorkar sum neih dan mila Cluster Model a State University hi din tum anih avangin State Capital Aizawl chu a hmun atana thlan anih tak chhan nia an hriat thu a sawi.
Pu Rodingliana Khiangte chuan University thar hlak, a tul zawng zawng State sum atanga din turin kan Sorkar chuan a tlin lo niin a lang a ti a, College chang tlung tak lo din tawhna sa bakah Post Graduate zirna pawh lo awmsa tawhna Aizawl chu a ni a, tin Teacher Education Institution leh Ph.D thlenga zir phalna nei sa tawh te pawhzawma din chu Sorkar tih theih chin tun dinhmunah nia a lan avangin State University chu Aizawla dah turin thlan loh theihloh nia hriat anih thu a sawi.
Lungleiah hian Sorkar hnuaiah College pahnih chauh a la awm a, tin, Higher & Technical Education Deptt. hnuaia College ten Deptt. an offer ang pawh a la awm kim thei lo tih Pu Rodingliana Khiangte chuan a sawi.
Lunglei ngeia State University dah duha mimal leh NGO-te thahnem ngaihna chu fakawm a tih thu sawiin ZPM Southern Hqrs pawhin hei hi a duhdan a ni a, mahse thil nih dan leh kalphung te han zir chianna atang chuan he kan beisei tlanna leh duhna te hi thil harsa anih avanga pawi an tih thu sawiin, Lunglei hmasawnna tur leh Zirna in hmalam a pan zelna turah hian theih tawp chhuah tlang zel turin ZPM Southern Hqrs Lunglei chuan kan sawm nghal a ni, a ti bawk.
