11 Aug 2025: Vawiin khan Chief Minister Pu Lalduhoma kaihhruaiin Mizoram State Project Monitoring Committee te chu CM Conference Hall-ah an thukhawm a, hei hi an General Body Meeting vawi 6 na a ni.
Chief Minister chuan, MSPMC hnuaia team hrang hrangte in thawkrim tih ka hria a, project 18 in endikte kan enho leh dawn a, Annual Report te pawh kan siam dawn a, in hnathawh hi kan ram tan a tangkai em em a ni, a ti.
Meeting-ah hian kumin April thla atanga August thla thlenga hma an lakna report ngaihthlak a ni a. He mi chhung hian project 18 an tlawh hman a, chung zingah chuan, Development of Flatted Factory Complex at IIDC, Pukpui, Lunglei (Promotion of MSME in NER Region), Establishment of Solid Waste Management Centre at Hauruang (NLCPR) leh Construction of Market & Trade Centre at Chanmari, Lunglei (NEC) a tel a ni.
Heng an hmunhma tlawh tea an thil hmuhchhuah report leh an rawtnate committee-ah hian chipchiar taka sawi a ni a, a bawhzui zel dan tur pawh tarlan a ni.
Department hrang hrang 28 hnuaia thawh tur hna (projects) thar 138, endik leh tur chi an la khawm leh tawh a, Project data lakkhawm tur dang pawh hi a la awm niin an sawi. Heng project thar thawh hmabak an lakkhawm 138 te hi chu hna an thawh tan phat atanga engkim an enpui theih tawh dawn avangin, MSPMC endik hna hi a tangkai lehzual dawn nia ngaih a ni.
An endik tawh ho Annual Report 2024-25 siam turin an inpuahchah mek bawk. Project kalpui dan tur tha zawk nia an ngaih, rawtna an neih te pawh an sawi hova, an rawtnate hi a kaihhnawih department-ah thlen a ni ang. (DIPR)
