14 Aug 2025: Mizoram Journalist Association Lunglei buatsaihin vawiin chhun dar 12:00 khan Lunglei Press Club-ah “GST Eye – Opener Session” hun hman a ni a, Pu K.Lalrinawma, Vice Chairman LMC chu khuallian a ni.
Pu H.Lalthansanga President MJA Lunglei kaihhruaiah hian Khuallian chuan Mizote hi sawrkara chhiah pek hreh ang reng tak, Kohhran tana thil pek erawh phur em em kan ni a, a chhan ber niawm a lang chu Mizote hi mahni intodelh a midang thawhchhuah rin duhlo chi kan ni thin a amaherawh chu, rambuai hnu khan kan khawtlang nun nasa takin a nghawng danglam a, a thlawn hmuh leh dawn beiseina rilru kan nei nasa ta hle a ni, a ti. Kan ram leh khawtlang hmasawnna tur thawhlawm thawh Tax pek kan hre tlat hi a dik lo va tunah chuan Lunglei Municipal Council pawhin Property Tax kan la ve dawn tawh a heng Tax kan lak tur pawh hi zaa sawmriat chu Ward hmasawnna atan hman tur niin, zaa sawmpanga chu Local Council-te kutah a lut anga zaa panga chauh LMC chuan a chang dawn a ni, a ti.
LMC Vice Chairman Pu Awmtea chuan ram hmasawn kan tihte hian Tax pek an hreh lo mai ni lovin an intihhmuh zawk a, a chhan chu Tax an pek kha an ram tan tangkai taka hman a ni thin tih an hriat vang a ni tiin, keini pawh tax pek kawngah kan thanharh a hun ta hle a ni, a ti.
MJA Lunglei buatsaih “GST Eye – Opener Session” ah hian Pu Lalrothanga, Deputy Commissioner of State Tax, Pu H.Zarzoliana Asst. Commissioner of State Tax leh Pi C. Chawnghmingliani, State Tax Officer ten Subject then hrang hrang hmangin Tax chungchanga hriat tul hrang hrangte an zirtir a, zawhna leh chhanna hun hman a ni.
Vawiina hun hmannaah hian MJA Lunglei member-te bakah Lunglei District Consumers Association hruaitute an tel a ni.
