18 Aug 2025: July thla tawp atanga Myanmar atanga Mizorama rawn raltlan 32,000 chuang zinga mi 3,073 mit-naute leh kut ze thla chu lak a ni tawh.
Home department hotute hnen atanga thu dawn danin, biometric enrolment hi July thla tawp lam atanga lak tan ni mahse, hartsatna hrang hrang avangin an kal chakpui hlei thei lova. District 11-ah kalpui ni mah se, an khawl hman chiangkuang lo leh internet signal tha tawk lote chuan an hna a tithuanawp nasa hle niin district hrang hrang official-te chuan an sawi. Relief camp-a awmte a hlawma endik an awlsam rualin an fate hmun danga lehkha zira awm an lo awm ve bawk avangin an biometric data lak kim a harsa an tih bakah chhungte leh thiante belte bakah mi in luaha awm hmun karkik tak taka awmte chu khawtlang hruaitute tanpuina an hmu chungin hun a duh hle niin an sawi bawk. A bik takin Myanmar raltlan mikhual tam ber Champhai district, raltlan 13,500 chuang awmna-ah hian mi 177 chauh an la chhinchhiah thei a. Official-te’n an sawi dan chuan July ni 31 a he hna an thawh tan khan kutze thla lakna khawl a chhiat avangin an kalpui chak thei lova, August ni 9 khan Aizawl lama chhukin home department-in khawl 2 an lo pe a, chumi hmang chuan an kalpui chho leh chauh a ni.
Tun tum hi biometric enrolment chauh kalpui tura ngaih a nih laiin biographic data pawh lak khawm nghal a ni a. Raltlan hming, nu leh pa, a lokalna khua, Myanmar-a a awm lai leh Mizoramah enge a thawh tihte lak zel a ni. Tun hma khan mimal chanchin chhinchhiah hna hi kalpui chhuah vek a ni tawh a, temporary identity card pawh pek chhuah deuh vek an ni tawh chungin an dinhmun hi a danglam reng avangin mimal chanchin chhinchhiah hi thar thawh leh a nih thu home department hotute chuan an sawi.
Myanmar raltlan bakah hian Bangladesh Chittagon Hill Tracts atanga raltlan hi mi 3,000 tling lo an awma ngaih a ni a. Lawngtlai district-ah Bangladesh raltlan 2,000 chuang an awm a, Thenzawl khawpui-ah 299 awmin Lunglei district-ah Khawmawi khua-ah mi 63 an awm mek bawk a ni. (AIR)
