22 Aug 2025: Vawiin khan Mizoram Police Service Association (MPSA) chuan G.S. Arya Mess, PHQ ah an Conference vawi 15-na an hmang a. Chief Minister Pu Lalduhoma chuan khuallian niin a hmanpui a, Pu K.Sapdanga, Home Minister chu khualzahawm a ni.
Chief Minister chuan, MPSA te chu ruihhlo donaah te, state ralmuang bera chhal theiha Mizoram a awm theihna tura an hnathawh tinrengah lawmthu a hrilh a. Ruihhlo hi Sex dawta HIV thehdarhna hmanraw langsar ber a ni a, Ruihhlo do beihpui kan thlak hian HIV darh zel tur kan veng nghal a, taksa leh thlarau chhandamna hna kan thawk a ni, a ti. Tun hnaia Assam state nena ramria thil thleng chu a hriat veleh Assam Chief Minister nena an inbiak nghal thu sawiin, tuman harsatna siam zawnga engmah tih rih lo (status quo) tura kan lo sawidun tawh chu tha taka ken kawh kan remti dun a ni, a ti.
Chief Minister chuan, kan sorkar phat atangin eiruk dona lam kan rawn bei nghal chat a. Lok Ayukta kan thuam tha a, Inquiry Wing hawn belhin MPS Officer deputation post 3 (pathum) – Chief Inquiry Officer, Inquiry Officer leh Dy. Superintendent of Police te kan siam a. MPS Officer pathum zet in awm belh chuan hma kan sawn ngei turah kan ngai, a ti.
Mizoram Police constable recruitment neih tawh zawng zawnga belhchian dawl ber leh fair ber tia sawi ngam – Constable Recruitment tun hnaiah kan nei a, police 259 lak thar an ni, a ti.
Kan police zingah service laia thi kan ngah thin hi ka vei a, an thih chhan tam ber lah hi nun inthlahdahna kaihhawih natna a ni deuh zel a, in naute enkawl kawngah fimkhur rawh u, a ti.
Khualzahawm Pu K.Sapdanga pawhin Mizoram police ten Law & Order an kengkawh tha a, kan lawm hle, a ti a. Kan khawlaite a lo him loh tak em avangin September thlatir atang hian kawtthler leh khawtlang ralmuang zawk nei turin beihpui kan thlak dawn a ti bawk.
Pu Zosangliana, President, MPSA chuan sorkarin nikumah Police Quarters sakna tur Rs. vbch 50 min pe a, MPS kuminah MPS 8 lak mek a ni. Kan TA/DA leh kan hamthatna dang tam tak min pe chhuak a, Rifle Allowance min tihpunsak a. Constable 259 min lak thar sak a, tunah Sub Inspector 25 leh fourth grade 6 lak min phalsak leh a, sorkar chungah hian kan lawm em em a ni, a ti. (DIPR)
