22Aug 2025: Lungleia Saikuti Hall enkawlna Lunglei Municipal Council (LMC) kuta dah a nih hnua a hmasa ber atan, vawiin khan LMC thuneitute chuan Chairman Pu Lalzuithanga hovin Saikuti Hall chu tlawhin, a dinhmun leh hmalak dan tur an enfiah.
Saikuti Hall tlawhnaah hian LMC aṭangin Chairman Pu Lalzuithanga, Vice Chairman Pu K.Lalrinawma, Executive Councillor – Pu Zorinsanga Hmar leh Pi Lalhruaitluangi Sailo, Councillor Pi Lalmuanpuii Renthlei, Secretary Pi Zoramdini leh official dangte an tel a ni.
LMC Chairman Pu Lalzuithanga chuan an dilna ngai pawimawha sawrkar thuneitute’n Saikuti Hall enkawl hna LMC kuta an dah fel ta chu lawmawm a tih thu sawiin, Saikuti Hall chu Lunglei hmel lanna leh Lunglei ti-Lungleitu pakhat a nih angin a ṭha thei ang bera enkawl an tum thu a sawi a. LMC chuan mipuite leh Saikuti Hall ṭhatna duhtute nen theih tawp chhuah tlangin ṭha tak leh mawi taka Saikuti Hall chei ṭhat theih an beisei thu sawiin, chumi atan chuan mipuite thawhpuina leh ṭawiawmna a ngen a ni.
