04 Sept 2025: Ministry of Education, Govt. of India chuan vawiin khan India rama University leh College ṭha a thlanna, ‘National Institutional Ranking Framework’ (NIRF) ranking a tihchhuahah, Pachhunga University College chu college category-ah 49-na a ni a, Mizoram University chu University category-ah 89-na a ni thung.
NIRF result hi vawiin khan Bharat Mandapam, New Delhi-ah Union Minister for Education, Shri Dharmendra Pradhan chuan a puang a. He inkhawmah hian India rama University leh College ṭha thlan chhuah aiawh mi ṭhahnem tak an tel a, Pachhunga University College aiawhin Principal, Prof. H.Lalthanzara leh Mizoram University aiawhin Registrar, Prof. Lalnundanga te an tel bawk a ni.
NIRF hi sorkar laipui, Ministry of Education-in India rama zirna in sang (higher educational institution) te inelna tur atana tehfung mumal tak hmanga a buatsaih a ni a. Kum 2015 aṭanga bul ṭan a ni a, kumin hi a kum 10 na a ni.
Kum 2025-ah hian college category-ah pakhatna chu Hindu College an ni a, pahnihna chu Miranda House niin pathumna chu Hans Raj College an ni.
Ranking tehna 2023-2024 angin PUC-ah hian UG-ah zirlai 2761 an awm a, PG lamah zirlai 88 an awm bawk. PUC-ah hian Arts, Science, Commerece leh Management stream-ah department 23 an awm mek bawk. (DIPR)
