CM hovin Sorkar laipui hmalakna hrang hrang state-a kalpui dan vilzuitu Committee an thukhawm
26 Sept 2025: Sorkar laipui hmalakna hrang hrang state chhunga kalpui dan ngaihtuahzuia vilzuitu – State Level DISHA Committee (Development Coordination and Monitoring Committee) chu vawiin khan an Chairman, Chief Minister Pu Lalduhoma hovin Planning & Programme Implementation Department Conference Hall-ah an thukhawm.
Chief Minister chuan, DISHA Committee chu a hming put angin Sorkar laipuiin ram leh mipui hmasawnna atanga scheme hrang hrangte kalpui a nih danah thawhhona “coordination” leh vilzuina “monitoring” a ken tel avangin department te thawhho an thiam a, a remchanna apianga thlunzawmna (convergence) kalpui a tul thu a sawi a. Department hrang hrangten an hnuaia scheme an kalpui danah chak zawka hna an thawh tlan a tul thu a sawi a ni.
Vawiin meeting-ah hian Sorkar laipuiin central scheme sum hman dan leh inpek dan kalphung thlak danglama SNA-SPARSH hman anih tak avanga harsatna tawh dan te sawilan a ni a. Central scheme kalpuitu department hrang hrangte dinhmun leh harsatna an tawh dangte ngaihthlak a sawiho a ni.
State Level DISHA Committee-ah hian Prof. Lalnilawma, Minister, Rural Development chu Co-Chairman niin RD Department Secretary chu Member Secretary a ni a. Member-ah Lok Sabha leh Rajya Sabha MP te bakah Pu T.Lalhlimpuia, MLA, Lunglei West Constituency, Pu Lalramliana Papuia, MLA, Lunglei South constituency, Lt Col. Clement Lalhmingthanga, MLA, Champhai South Constituency, Pi Baryl Vanneihsangi, MLA, Aizawl south-Ill Constituency, Pu K. Laldawngliana, MLA, Tuirial Constituency leh Pu K. Hrahmo, MLA, Palak Constituency te, Central Scheme kalpuitu sorkar depart 30 bawr hotute leh mimal leh tlawmngai pawl aiawh ruat bikte an tel a ni. (DIPR)
