02 Oct 2025: Mizoram Baptist Kohhran Chanmari Pastor bial Lunglei chuan an kum 50 tlin Golden Jubilee pualin vawiin khan BCM Chanmari Kohhran Jubilee Hall-ah a thlawna inentirna, ‘Free Clinic’ lian tham tak an buatsaih. Bial chhunga mi Doctor 18 thiamna hrang hrang neite chu pindan hrang hrangah an thu a, an bial chhunga mite vek Nurse 20 chuangin an puibawm a, mit leh mihring kawchhung lam enna khawl te chhawp niin damdawi a thlawna sem a ni bawk. Bial chhung leh bial pawn atangin inentir thahnem tak an awm.
BCM Chanmari Pastor bial hian an bial Golden Jubilee hi kumin kum tir atang khan Programme hrang hrang hmangin an lawm tawh a, October ni 9 atanga ni 12 chhunga bial inkhawmpui BCM Zion Kohhran Ramthar Venga an neih hunah Golden Jubilee ruai bial huapin an theh dawn a ni.
