03 Oct 2025: Vawiin khan Chief Minister Pu Lalduhoma chuan a bial Buangpui Community Hall-a Buangpui Branch YMA kum 50-na (Golden Jubilee) lawmna chu khuallian niin a hmanpui.

Thu sawiin Chief Minister chuan, Buangpui mipuite lawmpuina a hlan a, Branch YMA lo kaihruai tawhtute chungah lawmthu sawiin tuna kaihruai mektute chu hmathlir fel tak neia kaihruai zel turin a chah.

YMA chu pawl zahawm leh thianghlim, mi zawng zawng lenna a ni tiin, Village Council-te hi tha hle mah se party leh party inepna boruak keng chunga din an ni a, inthenna (division) kha a nei nghal a. Kohhrante pawh hi a tha lutuk, nimahsela, kohhran hrang inkarah indaidanna (division) a awmsa tlat a, YMA erawh chu mitin lenna, daidanna engmah nei ve lo, Mizo hnam huikhawmtu, kristianna pen bosan si lo va Zonun zemawi chhawm nungtu leh zirtirtu a ni, a ti.

CM chuan, Infrastructure leh Technology lamah te, sum leh pai lamah te sang chho zel mah ila thangtharte nun a tlakchhiat zel si chuan, kan hnam hi a zuihral mai ang tih a hlauhawm a, YMA hian a venghim tur a ni, a ti bawk.

Chief Minister hian Thenzawl leh Buangpui ramtea hmasawnna ruahmanna sorkarin a neih mek thenkhatte a tarlang a. Thalaiten zirna an uar a tul thu te, ruihhlo laka fihlim a tul thu te, hmasawnna lo thleng zelin a ken tel inthlakthlengna lo dawnsawn thiam a tul thu te a tarlang bawk.

Khualzahawm Pu Lalhmachhuana, CYMA President pawhin thu a sawi.

Inkhawm hi Pu H.Lalbiaksanga, President-in a kaihruai a, Pu Lalngurliana, Secretary chuan report a pe thung.

Buangpuiah hian kum 1800 AD velah khan helai velah hian Hmar Buangpui hote an lo cheng tawh a, an hmun hming leh sulhnute pawh hriat leh hmuh theihin an la awm. Tuna Buangpui erawh hi chu Thenzawl lal Lalngurchhinan kum 1932-a Aizawl bawrhsap phalna laa a din a ni a. Rambuaiah khan Thenzawlah khawm phei an ni leh a, kum 1972 ah Bawk sain an kir leh a, kum 1975-ah YMA an din ta a ni.

Tunah hian in 114 awmin mihring 518 an cheng mek a, an zinga mi 358 hi YMA member an ni. (DIPR)