08 Oct 2025: Vawiin khan Luidung Nungcha man phal loh hun (Closed Season 10th Oct – 30th Nov, 2025) hawnna, District Fisheries Development Officer Lunglei leh Vanva Group YMA huaihawtin Vanva luiah hun hman a ni.
Khuh hawngtu Christina Lalramchhani, DFDO Lunglei chuan, sorkarin luidung nungcha te humhalh turin nasa takin ṭan a la mek a, tun ṭumah pawh Oct ni 10 aṭanga Nov ni 30, 2025 chhung hi eng hmanrua pawha lui kal phal loh hun Closed Season 2025 atan a puang leh tiin, hei hi ngai pawimawh a, dan bawhchhia hrem ngai awm lo hram tura hmalakpuiah mipuite a sawm a. Vanva group YMA-in Vanva lui humhalh nachang an hria chu lawmawm a tih thu leh ṭha taka thawkho zel turin a sawm bawk.
R. Zothantluanga, President Vanva Group YMA pawhin, Vanva lui chu kum 2000 aṭangin an lo humhalh tawh thu leh sawisel leh sawi hnawmna karah YMA chu a kal zel dawn tih sawiin, DFDO Lungleiin Closed Season khuhhawnna hun hman nana an lui humhalh ngei a rawn thlang chu lawmthu a sawi a, DFDO Lunglei leh DFO Lunglei te’n nasa taka an lo puih tawh thin thu a tarlang.
Christina Lalramchhani DFDO chuan Vanva group YMA-te chu sangha chaw bag 5 pein, an lui humhalha sangha te chu chaw a pe nghal a ni.
