09 Oct 2025: Vawiin chawhnu khan School of Nursing, Christian Hospital Serkawn chuan BCM Hall Serkawnah Graduation & Lamp Lighting Ceremony Programme an hmang a; BCM Associate General Secretary (Service) Rev..Vanlalmuankima chu khuallian a ni.
BCM-a Medical & Health Department Director Dr B.Laldinliana kaihhruai Graduation & Lamp Lighting Ceremony-ah hian khuallian Rev..Vanlalmuankima AGS chuan Nurse zir chhuakte a lawmpui thu leh result tha tak tak nei an awm chu a lawmpui thu a sawi a. Nurse hna chu Pathian rawngbawlna nen a inhmeh em avangin Pathian rawngbawlna ngai tlat tur leh an tawngkam leh hmel landan te chu damlote tan a pawimawh em em a ni tih hre reng turin a chah a ni.
Khuallian chuan zir tharte fuihna thu sawi bawkin, engemaw chang chuan hreawm tih chang te awm thin mahse mi dang zir châk tam tak zir ve theilo te an awm tih hriaa chhel taka zir turin a fuih bawk. Nursing School Serkawn chu sum hmuh nan a ni lova Zosap-te’n kan ram kan hnam dam nan min dinsak a nih avangin he sikula zirlaite chu an danglam bik a ni tih hre tlat tur leh Pathianin khawvel tieng tura min duh anga an awmna apiangah eng chhuak turin Nurse zirchhuak leh zirlai te chu a fuih a ni.
Khuallian chuan zirlai titha zualte hnenah Award hrang hrang hetiang hian a hlan — IIIYr Zirlai titha ber hnena hlan thin Biaklianzuali Award chu Lalbiakliani hnenah hlanin, Best Graduate Lalremruati Fanai hnenah hlan bawkin, Mizoram Nursing Council Exam result chhuak hnuhnung bera Top Ten-a langte hnenah lawmpuina Memento bakah BCM bik atanga lawmpuina pawisafai a hlan bawk.
School of Nursing, Christian Hospital Serkawn-in Graduation & Lamp Lighting Ceremony an buatsaihah hian zirchhuak mi 30-te thlan chhuah niin, zirlai thar mi 30-te hnenah Nursing School Lunglei Principal Pi C.Rothangpuii’n lukhum a khumtir bawk.
