Pi K.Lalrinzuali, IAS chuan kumdanga Electoral Roll Revision aia kan fimkhur leh zual a ngai dawn, a ti
Aug ni 25, 2023 tlai dar 4:00 khan kumin MLA inthlanna atana Electoral Roll Observer atana ruat leh Disaster Management & Rehabilitation Secretary ni bawk Pi K.Lalrinzuali, IAS chuan Lunglei DC Conference Hall-ah Election Official-te, MJA, political party aiawhte leh tlawmngai pawl aiawhte 2nd Summary Revision of Electoral chungchangah meeting a neihpui.
Pi K.Lalrinzuali chuan, kumin hi inthlan kum a nih avang leh Mizoram chhunga raltlante kan neih avangin kumdanga Electoral Roll Revision aia kan fimkhur leh zual a ngai dawn, a ti a. Draft Roll-a an chuan ve leh chuan ve loh inenna chang hre lo va, revision hun pelh tawh hnua office lama lo sawi leh te hi an awm thin a. Hemi chungchangah hian I&PR department leh MJA te bakah BLO te, VC te,party worker-te leh tlawmngai pawl hrang hrangte chu Revision hun laia Draft E/Roll a hming, address leh thildang siamthat ngai te, belh leh paih ngai ang chi zawng zawng chu tih vek a ngaih thu puanzar tam turin a ngen a ni.
Pi K.Lalrinzuali chuan, a hlawm hlawma vote transfer (Mass vote transfer) te a thlen loh nan ERO leh AERO te fimkhur hle a ngai dawn tiin, Lunglei district-in Electoral Roll rintlak, felfai leh funkim neih theih nan tlawmngai pawl, MJA leh Party hrang hrangte thawhpuina leh puibawmna a ngen a ni.
Aug ni 2, 2023 a draft E/Roll tlangzarh takah khan Lunglei district-ah, hmeichhe voter 49,675 leh mipa voter 48,841, an vaiin voter 98,516 an awm a, gender ratio chu 1017 a ni.
