06 Oct 2023: Vawiin chhun dar 12:00 khan Lunglei Science Centre & Digital Planetarium, Zohnuai, Lunglei chu Dr.Vanlaltanpuia, MLA & Chairman, Mizoram Youth Commission chuan a hawng.
Khuallian, Dr.Vanlaltanpuia,MLA & Chairman, Mizoram Youth Commission chuan Mizoram-a Science Centre pahnihna tur Lunglei Science Centre & Digital Planetarium peihfel a ni ta hi a lawmawm hle a ni a ti a. Mizoram chhim lam zirlai naupangte tan science zirna puitu hmun pawimawh tak leh mipui vantlangte zingah pawh science hriatchianna kawnga hmasawnna thlen tir tur a nih a beisei thu a sawi a. India ram state dangte bakah ramdangte hmasawnna ke pen ruala pen ve turin Lunglei leh a chhehvel District-te a duhsak thu a sawi a ni.
Report anih danin, Lunglei Science Centre hi Rs nuai 697 senga Mizoram sawrkarin a din a ni a. Digital Planetarium hi Dte. of Science & Technology hnuaia awm Mizoram Science, Technology & Innovation Council (MISTIC) hmalakna a Rs nuai 330 senga din niin, North Eastern Council atangin sum hmuh a ni, a ti a.
Science Centre hi Mizoram PWD design leh estimate a ni a, Digital Planetarium hi Kothari & Associate, Kolkota ten an design a, Landscaping hi Creative Museum Designer, National Council of Science Museum, Kolkata design a ni thung. Science Centre hian Type-II quarters 2 a chhawm tel a, total floor area hi 766.43Sqm a ni. Digital Plentarium-ah hian Astronomy Exhibition Hall, Conference Hall leh Training Hall a awm nghal a, total Floor Area hi 456Sqm a ni.Digital Planetarium Dome hi 8m diameter niin, seating capacity hi 50 a ni.
