Consumer Activist Pu Lallunghnema’n Consumer te chanvo humhalh chungchang leh Centre for Consumer Education hmalakna te a tarlang
Lunglei; 20th October 2023: Consumer Activist Pu Lallunghnema, Centre for Consumer Education (CFCE) Chairman chuan nimin khan YMA Sub-Hqrs Lunglei Conference Hall, Venglai-ah thuthar thehdarhtute kawmin; Consumer/Mipui te dikna leh chanvo humhalh chungchang leh CFCE chanchin leh hmalakna hrang hrangte a sawi a. Pu Lunghnema hi Lunglei District Consumers’ Association (LDCA) hruaitute’n an tawiawm a ni.
Pu Lunghnema’n a tarlan danin CFCE hi April ni 1, 2020-a din niin; Registered Office chu Aizawl Republic Mual Vengchung a ni a; Contact No. 9862288182/94002321590 a ni. Pawl thil tumte: Consumer-te dikna leh chanvo humhalh sak, Consumer Advocacy a zau thei ang bera mipui tana buatsaih, Consumer-te ei leh in, tui thianghlim leh tlo an hmuh theih nana hmalak, Consumer Awarness Programme chi hrang hrang buatsaih, Sawrkar leh NGO dangte nen a tul anga thawhhona neih, Consumer-te dikna leh chanvo humhalh a nih theih nan Corpus Fund ngaihtuahpui, Mipui chanvo leh dikna humhalh a nih theih nana hmalak leh Consumer-te’n bungraw tha leh hmantlak an lei theih nana thawh.
CFCE Chairman chuan tunah hian Institute/College leh Department hrang hrang 25 te nen an thawhho mek thu leh Aizawl Law College nen MoU an ziah thu a sawi a. Hmanraw hrang hrang hmanga awareness campaign an neih tawh dante tarlangin; Seminar, Training, Essay Competition leh Consumer Pual Kawngzawh te pawh buatsaih chhoh zel an tum thu leh Consumer-te dikna leh chanvo humhalhna kawnga thil tul tak tak atan project siama Sawrkar-a thehluh tum a nih thu te a sawi a. Sumdawng thalo leh Dawrkai thalo te hmachhawn ngam a ngaih thute sawiin, Ration sem dan chungchangah pawh hunbi tuk leh ruat ang te tha taka zawm tur a nih thu a sawi a ni.
Pu Lunghnema chuan, he hna, mipui rawngbawlna hi Pathianin a pek a nih thu leh CFCE chu institution anga a kal thu a sawi a. Lunglei District-ah thawhpui tur neih a tul thu leh mihuaisen mamawh a nih thu a sawi a; “Lunglei khawpui atangin ‘eng’ a awm dawn niin ka hria,” a ti.
Consumer hruaitute chuan Sawrkar-in a hranpa liau liaua hlawh pawh pe-a a mi rawihte’n an duty tha taka an tih a tul thu te an sawi a. Thil leitute’n receipt/voucher lak zel a pawimawhnate an sawi bawk.
Consumer Association lamin an tihtur leh hmalakna tur a awm rualin, hma an lak zui theih nan mipui lam mawhphurhna pawh a awm, an ti a. Mimal, mahni dikna leh chanvo dinpui-a Commission/Court thleng ngam leh kal ngam awm a ngai a ni, an ti.
