Lunglei; 30 October 2023: ## Mizoram SSA Teachers Association, Sub Hqrs Lunglei chuan thuchhuah siamin, Mizoram SSA Teachers Association ( MSSTA ) Sub Hqrs Lunglei OB te chuan ni 29.10.2023 khan Lunglei East Assembly Constituency a MPCC Candidate Pu Joseph Lalhimpuia (Mahima) kawmna hun kan nei a, sawrkarna an chang anih chuan MSSTA High Court kalte chu High Court thuchhuak ang ngeia min dahngheh an tum thu Party President-in a lo sawi chu an tih ngei dawn thuin min lo chhang, an ti. Inkawmna hun kan neih dawn avang hian Party President Pu Lalsawta nen engkim an lo sawiho hmasa a, a thusawi hi Pu Lalsawta thu hmua sawi anih thu min hrilh bawk, an ti.
## Vawiin khan Sacred Heart Higher Secondary School Zirlaite chuan Congress Bhavan Lunglei tlawhin Lunglei District Congress Committee (LDCC) hruaitute nen inkawmna hun an hmang.
LDCC President Pu K.L. Chhawnzauva chuan, Congress Party a sawrkar chuan thalai mahni kutke a dinchhuah tuma tan la mekte leh tan lak duhte chu Tang Puihna Rs Nuai 2 in an tanpui dawn tih a sawi a, Tang Puihna hian zirlai lehkha zir chhunzawm zel duh te, thiamna sang zawk bei duhte pawh huam tel vekin Tang Puihna chu zirlaite tan pawh an kal zelna turah chhawrnaawm tak a ni dawn a ni, a ti.
## Vawiin chawhnu khan ZPM Southern Hqrs hnuaia MLA Candidate 9 te chuan an Party Office, Venglai Lungleiah thutiamna an nei. ZPM MLA official Candidate ten thutiamna an neih inkhawm Rev.Darchungnunga kaihruaiah hian Rev.Dr. K.Thanzauva Vice President, ZPM Hqrs Aizawl-in hunserh a hmang a. Kan Pathian chu miretheite lama tang anih avangin a mite au aw chu Pathianin a hria a, chuvangin ZPM chuan retheite lam hawi politics, bana kaih policy kalpuiin sem policy kan ti tawp dawn a ni, a ti. He hunah hian Rev.V.Kapenga’n Val Upa Council mawhphurhna leh thuneihna te a sawi hnuah Rev.Darchungnunga, VUC member kaihhruainain thutiamna an nei a ni.
