BJP-in sawrkarna a siam phawt chuan Mizoram-in nasa takin hma a sawn dawn niin Union Minister Pu Sonowal chuan a sawi
Lunglei; 02 November 2023: Union Minister for Ports, Shipping & Waterways and AYUSH, Pu Sarbananda Sonowal chuan BJP tana campaign-in nimin chhun khan Lunglei-ah hun a hmang.
BJP Lunglei District buatsaih vantlang inkhawm Lunglei Tennis Court hluia neihah Union Minister Pu Sonowal chuan, Prime Minister Pu Narendra Modi kaihhruaiah India ram chuan nasa takin hma a sawn a, India ram state hrang hrang BJP sawrkarnaah pawh hmasawnna nasa takin a thlenga Mizoram pawhin hmasawn a duh chuan BJP sawrkar siam angai a ni, a ti. Congress kum 60 chuang a sawrkar chhung khan India hmarchhak hian hmasawnna a neih loh em em laiin BJP kum 9 leh a chanve a sawrkar chhung hian India hmarchhak ramte chuan nasa takin hma a sawn a, Pu Modi-a kaihhruai Central sawrkar hian India hmarchhak ramte hi a ngaihtuah em em a ni, a ti.
Modi Sawrkar chuan India hmarchhak hmasawnna atan hian Rs Vbch Nuai 65 chuang dah tawhin Central Minister hrang hrangte leh amah Pu Modi-a ngei pawhin India hmarchhak ramte hi an intlawh chhawk reng a ni Pu Sonowal chuan tiin, Manipur buaina chu hnam leh hnam buaina a ni a, Sakhuana thil avanga buaina a nilo tih kan hriat angai a, India ramah hian sakhaw tinten zalenna kan nei vek a ni, a ti. Lunglei District hmasawnna turin BJP Vote tlin angai a, BJP in vote tlin chuan hmasawnna tur sum tam tak bakah Airport kan siam ang, a ti.
Union Minister Pu Sonowal chuan BJP thlantlin an nih chuan Lunglei Dist-ah hmasawnna kawng hrang hrang, inkalpawhnate, Agriculture lamah leh eizawnna kawng hrang hrangah hmasawnna nasa tak kan siam dawn a ni ti bawkin, Bangladesh leh Myanmar ram nen insumdawn tawnna tur BJP sawrkar hmalakna awm mek chu tihpuitlin anih hunah chuan Lunglei District-a thalai tam takin hnathawh tur an nei dawn tih sawiin, Congress sawrkarin Mizoram tan engmah hna a thawh loh avangin Mizoramin hma a sawn thei lo va, BJP-in sawrkarna a siam phawt chuan Mizoram leh Lunglei District hian nasa takin hma a sawn dawn a ni, a ti.
