09 Nov 2023: Mizoram Kohhran Hruaitute Committee kaihhruaiin tlawmngai pawlte leh party hrang hrang hruaituten inthlanpui vote chhiar hun sawn tura an ngenna a la hlawhtlin theih loh avangin Chief Electoral Officer, CEO Madhup Vyas an hmu.
MKHC, NGO Coordination Committee hruaitute leh party hrang hrang hruaitute chuan vote chhiar hun atan Election Commission of India-in hun a ruat December Ni 3 chu Kristian te ni serh Pathianni a nih avangin a hun sawn tura an ngenna kawngah CEO chu thawhpui turin an sawm a, CEO chuan an ngenna a ngaih pawimawh tur thu sawiin ECI-ah Mizoram a vote chhiar ni sawn tura ngenna lehkha a thehluh tur thu a lo hrilh.
Mizoram Kohhran Huraitu Committee, Joint Secretary Pu Lalnilawma Colney chuan CEO-in chhanna a pek chu a lawmawm lam a nih thu a sawi a, an ngenna hmasaah ECI atanga chhan-na darkar 24 chhungin beisei mahse tun tum an ngennah chuan hun bituk an nei lo tih a sawi. (DD Mizoram)
