19 Nov 2023: Champhai district Vaphai khaw Assam Rifles camp a awm Myanmar sipai rawn tlanchhia 29-te chu vawiin chawhma lam khan Indian Air Force helicopter hmanga thiarchhuah an ni.
IAF helicopter hi Imphal atanga rawn tirh ni a hriat a ni a. Vaphai helicopter tumhmunah rawn tumin Myanmar sipaite hi phurh chhuah an ni a. Manipur-a Moreh khua-ah dahin heta tang hian Myanmar sipai-in an ram ril zawkah an hruai dawn ni a thudawn a ni.
Nilaini zing dar 4:00 vela Chin National Defence Force (CNDF)-te’n Tuibual rama Myanmar sipai camp an lak avanga Myanmar sipai tlanchhiate chuan Ningani chawhnu dar 2:18 vel khan Saikhumphai an thleng a. Police-te’n an tihtur an tihfel hnu-ah Vaphai-a Assam Rifles camp a hruai an ni a. Ningani leh Zirtawpni-ah ruah a sur nasat avanga hruai chhuah theih an nih loh avang leh Inrinni-ah pawh khua a la thian loh avangin vawiin khan helicopter hmanga thiarchhuah an ni ta a ni.
Vaphai khawtlang hruaitute hnen atanga thudawn danin Tuibual camp a inkahna avangin Tiau lui chhak lawka awm Leilet khaw mi chhungkaw 63, mihring 600 vel chu Saikhumphai-ah an tlanchhia a. Mahse, tunah erawh chuan an khua-ah an kir leh deuh vek tawh a ni. [AIR Aizawl]
