23 Nov 2023: YMA Sub-Hqrs Lunglei Golden Jubilee lawmna inkhawm vawiin khan Convention Centre, Lungleiah neih a ni a, Prof. Lalnuntluanga Central YMA Vice President chuan khuallian niin a hmanpui.
YMA Sub-Hqrs Golden Jubilee lawmna inkhawm Pu CMS Dawngliana Vice President, YMA Sub-Hqrs Lunglei kaihhruaiah hian khuallian Central YMA Vice President chuan, Sub-Hqrs YMA Lungleiin kum 50-na a thleng chu thinlung takin CYMA chuan a lawmpui a, hetiang a thlen theihna tura hruaitu hmasa te inpekna kan zahin kan ngaihlu hle a ni, a ti. CYMA-in Sub Hqrs a neih zinga upa ber leh Pa chan chang thiam YMA Sub-Hqrs Lunglei chu CYMA chuan a chhuangin CYMA hmalakna tura finchhuahtu ber an nihna te, CYMA-in tih tur a tih tha taka an tih thin dan te chu kan hre rengin kan chhuang hle a ni, a ti.
Prof.Lalnuntluanga chuan, YMA-ah mimal hlawkna zawn a remchang lo va, Pressure Group a ni lo bawk a chuvangin Sawrkar hmalakna dodal zawnga chet vak te a remchang lo va, sawrkar finchhuah leh thawhpui chu a tih tur a ni ti bawkin, YMA hi Mizote minti pumkhattu a ni tih hre rengin chutiang tur chuan YMA hi i kalpui zel ang u, a ti.
He hunah hian MJA Dist Hqrs Lunglei President chuan MJA aiawhin lawmpuina thuziak YMA Sub Hqrs. President hnenah a hlan a ni.
YMA Sub-Hqrs Lunglei Golden Jubilee lawmnaah hian President nilai Pu K.Lalfakzuala’n Golden Jubilee lungphun a hawng a, hruaitu hluite chawimawina hlan a nih bakah CYMA atanga hmanpuitute hnenah thilpek hlan a ni bawk.
YMA Sub-Hqrs Lunglei hnuaiah hian tun dinhmunah Branch 134 awmin Member 50,103 an awm mek.
