29 Nov 2023: Kuki-Zo te tana Manipura inrelbawlna hran ngiatin vawiin khan ramchhunga khawpui leh thingtlang khaw hrang hrang 26-ah mipui thahnem takin kawng an zawh.
He kawngzawh hi Zo United huaihawt niin he huna mipui pungkhawmte chuan Manipura buaina chu inrelbawlna hran an neih chauha chinfel theih a nih thu te, Meitei sorkar an duh loh thute leh tribal area-a sorkar hran an duh thu bakah buaina chinfel vat anih loh chuan an chawlhsan dawn loh thu tein an aurual a. Kuki-Zo hnamte chuan thla 7 chhung tihduhdahna hrang hrang an tawrh tawh thu leh Kuki leh Zo te tana Meitei sorkar enkawl Manipur state chhungah ngaihngam taka nun hman chu beisei chi pawh anih tawh loh thu an sawi a ni.
Zo united-te hian vawiin khan sorkar laipui Home Minister Pu Amit Shah hnenah memorandum thehlutin hetah hian Kuki Zo te tihduhdaha an awm chu thla 7 lai anih tawh thu leh he buaina hi lo thleng ve tawp ni lovin, Manipur Chief Minister N.Biren Singh leh a thawhpui hrang hrangte’n fing taka an ruahman anih thu an tarlang a. Kawng hrang hranga Kuki-Zo te rahbeh an nih dan tarlangin, memorandum-ah hian Manipur khawpui Imphal atanga Kuki Zo mipuite hnawhchhuah an nih avanga zirna, eizawnna, damlo enkawl leh thil hrang hrang hranga harsatna awm te, state sorkar leh dan kengkawhtu police-te Meitei te lama an tan tlat avang leh tribal mipuite hmasawnna tur sum hrang hrang a dawngtu turte hnen a thlen theih tak loh avangtein inrelbawlna hran chu hmanhmawhthlak takin an mamawh tih an tarlang bawk a ni. (AIR Aizawl)
