December ni 4, 2023, dar 8:00AM atanga General Election to the Mizoram Legislative Assembly, 2023 vote chhiar tura inbuatsaihna hrang hrangte tluang taka kalpui niin, vote chhiar turin Mizoram a inpeih tawh a ni. Vote chhiarna hmun tur Counting Hall-te chu Election Commission of India thupek angin vote chhiar hma ni 3-ah buatsaih fel vek tur a ni a, hengte hi District hrang hrangah peihfel vek tawh a ni.
Vote chhiar tura mawhphurhna hrang hrang neite’n training an nei zo fel tawh a. Vote chhiarnaah hian Returning Officer, Assistant Returning Officer, Counting Supervisor, Counting Assistant, Micro-Observer leh hna pawimawh dang hrang hrang thawktu mi 2,780 vel an awm dawn a. Polling Station tina Presiding Oficer 1,276 te chu vote chhiar ni hian an awm bawk ang. Security mi leh sa ten Counting Centre tinah thuah thumin venhim hna an thawk dawn a ni.
Mizoram Inthlanpui 2023 General Election to the Mizoram Legislative Assembly, 2023 kalpui mekah hian November ni 7, 2023 khan boruak muanawm tak hnuaiah hlawhtling taka vote thlak niin, zan dar 11:50 ah zawhfel hman a ni a. Repoll ngaihna awm chhun 20/13 Muallungthu Polling Station-ah chuan November ni 10, 2023 khan repoll tluang taka neih a ni a, Mizoram puma EVM hmanga vote tla zat chu 80.66% a ni. Heng bakah hian Postal Ballot hmanga vote thlak (Home Voting, Facilitation Centre Voting leh Service Voter) te awm bawkin vote chhiar fel zawhah inthlanpuia vote tla zat dik tak (EVM leh Postal Ballot hmanga vote tla zat belhkhawm) a hriat theih dawn a ni.
General Election to the Mizoram Legislative Assembly, 2023 atan hian Assembly Constituency 40-ah chuhtu Contesting Candidate 174 an awm a, hmeichhia 16 awmin bial 18-ah an ding a, Independent-a ding mi 27 an awm bawk.
Election Department chuan boruak muanawm tak hnuaia vote thlak anih ang bawkin vote chhiar pawh kalpui anih ngei a beisei a; hemi tur hian Candidate, Political party-te leh mipuite tawiawmna a ngen a ni.
Model Code of Conduct (MCC) hi inthlan kaihhhnawih zawng zawng zawhfel a nih hma December ni 5, 2023 thleng chu hman chhunzawm zel tur a ni tih Election Department chuan mipuite a hriattir nawn leh a ni.
