04 Dec 2023: MNF President leh Chief Minister nilai Pu Zoramthanga chuan vawiin tlai dar 4:00-a Larsap Dr Hari Babu Kambhampati hnena banna a theh luh hnuah Thutharthehdarhtute zawhna chhangin, an tlak chhan lian berah hripui leng vanga harsatna tam tak a sawrkar kaihhruaiin an tawh vang a ni a ti a, hripui leng chu eptu lam ten hmang tangkaiin sawrkar hnathawh thatloh tinreng an sawi tih sawiin hei hian mipuite rilru a hneh em em a ti a, mipuite-ah insawifiah an tumin a tam zawkin an awih zo lo tih a sawi.
MNF President chuan vawiina vote chhiar hma chuan sawrkarna siam ngei an inbeisei a ti a, sawrkar dinglai paih thlak duhna lian tak mipuiah a awm vangin MNF chu an tla tih sawiin mipuiten Congress leh MNF nilo sawrkar hmuh hrim hrim an chak vang a ni tih a sawi.
Pu Zoramthanga chuan ZPM chu a nawlpuiah mipuiah an tlak nat avangin khawpui zawng zawng pawh an la vek a ti a, MNF chu vawi tam tak lo tla tawh thin annih avangin nghawng lian tak a nei dawn lo a ti a, an tlak hnuah nasa takin an thochhuak thin tih a sawi.
MNF President chuan NDA chungchang zawhna chhangin, amah chu NDA dintute zing a mi a ni a ti a, MNF hotute nen an awm zel dan tur an ngaihtuah dawn tih sawiin; amah chuan chhuahsan a hreh lo tih a sawi bawk. (DIPR/AIR Aizawl)
