06 Dec 2023: Zoram People’s Movement (ZPM) Party Leader Pu Lalduhoma chuan a kaihhruai ZPM chuan sawrkarna a siam thei tih vawiin khan Mizoram Governor Dr Hari Babu Kambhampati a hrilh.
Pu Lalduhoma hian Larsap hi a chenna Raj Bhavan, Aizawl-ah hmu-in, he hunah hian Pu Lalduhoma hi MLA atana thlan thar dang– ZPM Working President Pu K.Sapdanga bakah Pu Vanlalhlana te’n an tawiawm a. Larsap chuan Pu Lalduhoma hi Chief Minister atana a ruatna lehkha a lo pe a ni.
ZPM MLA atana thlan thar te lakluh inkhawm hi naktip (December ni 8, Zirtawpni) chawhma dar 11:00-ah Raj Bhawan Circular Lawn-ah neih a ni dawn a; hemi nî hian Council of Minister 12 te lakluh nghal a ni ang. ZPM Legislature Party Leader Pu Lalduhoma chuan thuthar thehdarhtute kawmin; karleh Thawhlehni (December ni 12)-ah Assembly Session hmasa ber neih a ni dawn a ni, a ti.
Pu Lalduhoma chuan Union Home Minister Pu Amit Shah-a nen an inbiak tawh thu sawiin, Mizoram-a râltlante enkawlna chungchang pawh a rang thei ang bera sawiho a nih tur thu a sawi a. India Constitution hian India khua leh tui te a hum vek a, Sawrkar tla ta-in râltlan a enkawl te pawh chhunzawm a nih tur thu leh a aia tha zawk a tihdan a awm chuan ruahmanna an siam chhoh zel tur thu a sawi bawk.
Pu Lalduhoma chuan Union External Affairs Minister Pi S.Jai Shankar nen an inbia tih sawi bawkin, Myanmar râltlan chungchangte leh India sawrkar leh thenawm ram te dinhmun chungchang te pawh a tak ngeia an sawi dun tur thu a sawi a; râltlan te chu lo chhawm dawl thei turin theihtawp an chhuah dawn tih a sawi bawk.
Nizan khan ZPM MLA thlan thar te thukhawm chuan ZPM Legislature Party dinin, Leader tur an thlang nghal a. Member-te’n lungrual takin ZPM Legislature Party Leader-ah Pu Lalduhoma [Serchhip bialtu MLA] thlangin, Deputy Leader atan Pu K.Sapdanga [Aizawl N-III bialtu MLA] an thlang bawk a ni. [AIR Aizawl]
