12 Dec 2023: Chief Minister Pu Lalduhoma’n sawrkar sum dinhmun a chhiat avangin inren taka kal a ngai dawn a ti a, hlawh tih pun a ni dawnlo tih sawiin bial chhunga department hmalakna tunhmaa MLA-ten an hmuh ngailoh chu sawrkar tharah chuan MLA-te hnen a thleng vek dawn tih a sawi.
He thu hi vawiina Assembly pakuana thutkhawm vawi 1-naah sawiin House Leader leh Chief Minister Pu Lalduhoma chuan sum dinhmun a chhiat avangin inren taka sawrkar a kal a ngai dawn a ti a, hlawh tih pun a ni dawn lo tih sawiin MLA-te chu mipuite tana ding annih angin theihtawp chhuah turin a chah bawk.
House Leader Pu Lalduhoma chuan Speaker thar Pu Lalbiakzama chu a lawmpui tih sawiin House zahawmna rei tak anlo kalpui tawh chu chhunzawm se a duh a ti a, MLA nih chu thil harsa tak ani tih sawiin vawi 14 a in candidate-ah vawi 6 chiah a tling thei tih sawiin tling zo ta lo te pawh hrehawm ti lo turin House kaltlangin a chah a, House-ah chuan taihmak leh thawhrim a pawimawh tih sawiin thil thar tawn ngai loh zir tur a tam a ti a, Orientation course parliament-in an buatsaihah zir tur tam tak a awm tih sawiin kal tawhte pawh kal leh zel se tiin a sawi bawk.
Pu Lalduhoma chuan Term 3 chhung opposition group leader a ni tih sawiin Pu Lalthanhawla leh Pu Zoramthanga te a hrawn laia an tihdan phung tha tak chu Speaker thar kaihhruaina hnuaiah tha taka chhawm nun zel ni se a ti a, speaker thuawih theih te, tawngkam hawih hawm leh Mizo Kristian nihna tih lanna pawimawh tak ni thei se a duh tih a sawi bawk.
Pu Lalduhoma chuan a kaihhruai Zoram People’s Movement sawrkar tharah Member zahawm tak intih leh Sir intih chu tih tam vakloh ni se a ti a, Chief Minister zarah tih sawia in fak uchuak chu sawrkar tharah ni lo se tih a sawi bawk. (AIR Aizawl)
