13 Dec 2023: Mizoram Legislative Assembly 9-na thutkhawm neih mekah vawiin khan Governor Dr Hari Babu Kambampati chuan thu sawiin, sum inrenchemna kalpui tur chu Chief Minister Office a\anga a hniam ber thlengin kalpui a ni ang, a ti.
Larsap chuan state sum dinhmun a that loh avangin sum leh pai te awmze nei tak leh inren taka hman a nih tur thu sawiin, zan khat thilthu-a sum dinhmun siamthat thut theih a nih loh avangin kum khat emaw chhung tal a mamawh dawn, a ti bawk.
Sawrkar thara an ngaih pawimawh tur thilte tarlangin; sawrkar inrelbawlna tha tak hnuaia mipui tana hnathawhte, langtlang leh innghahna tlak siamte, sector zawng zawngah hmasawnna ngelnghet siam tura hmalakte, thil siamchhuahna industry sector lama tan lakte, mitin ban phaka sawrkar hamthatna siamte chhawpchhuah leh mipuite mamawhna zawn zela hmalakte, thalaite tana hamthatna leh hmasawnna buatsaih leh chhehvel boruak, thing leh mau, leilung, nungchate venhim leh humhalh bakah khuarei thlenga chhawr tur leh hlawkpui tur hmasawnna ruhrel dinte ngaih pawimawh a nih tur thu a tarlang bawk a ni.
Governor chuan loneitute tan agriculture leh a kaihhnawih thil tharchhuah te hlawk zawka hralh a nih theih nan sum ruahman a ni ang, a ti a. Sawhthing, aieng, hmarcha leh hmunphiah te chu tun sawrkar kum chhung ngeiin leisak an ni ang, a ti bawk.
Healthcare chungchang pawh sawiin, tuna healthcare chu tichangtlungin huam zau zawkin mitin tana siam\hat a ni ang a, hmunhma leh hmanrua te tun aia changtlung zawkin siam a ni ang, a ti bawk a ni.
Larsap chuan sawrkar tharah eirukna leh hlemhletna te na taka do a ni dawn tih sawiin, eirute lakah ngaihnathiamna a awm dawn lo, a ti a. Eirukna chhui turin Central Bureau of Investigation (CBI) chu chhui phalna general consent pawh pek an ni ang, a ti bawk.
Governor chuan MLA thlan tharte a lawmpui thu sawiin, inthlanna hlawhtling neih a ni chu lawmawm a tih thu a sawi a. MLA thlan thar zingah hmeichhia pathum lai an tel chu Mizoram inthlan chanchina thil chhinchhiahtlak tak a ni, a ti bawk a ni. (AIR, Aizawl)
