15 December 2023: Mizoram Pradesh Congress Committee President Pu Lalsawta chuan miin duh rihlo mahse mi duh turin an insiamtha anga an hmaah hian beiseina eng a awm a, chu chu an zui zel dawn a ti.
Nimina Aizawl-a Congress Party office Congress Bhavan kharna leh Lawngtlai West Bial atanga thlantlin Pu C.Ngunlian-chunga lawmpuina hun an hmannaah he thu hi sawiin Pu Sawta chuan, ram leh hnam tana thawktu Pu Ngunlianchunga an nei chu Congress Party a vannei em em a ni, a ti a. Inthlan kalta khan beiseina sâng tak an nei a, mahse an beisei ang an ni pha ta lo, a ti a. Mipuite’n ZPM ‘enchhin’ an duh a, an enchhin hma chu an rilru a dam dawn lo a ni, a ti.
Pu Lalsawta chuan ZPM Party chu thinlung takin a lawmpui tih a sawi a, sawrkar tha an siam chuan an sawrkar nen a inang reng ni a sawiin, an tan tawngtai a tul, a ti.
He hunah hian Pu Ngunlian-chunga pawhin thu sawiin, a bialah MDC bial 11 a awm a, tun tum inthlannaah hian MDC pakhat pawh an nei lova, mahse Pathian-in a hruai a, hnehna a chantir chu a lawm em em a ni, a ti. Politics-ah tupawh an khingpui an ni ang a, mahse an khingpuite nen mimal inhuatna neih loh tur, a ti a. Ani pawhin a khingpui lo ni tawhte nen mimal inhuatna an nei ngai lova, tun hnuah amah puitute an lo ni zawk a ni, a ti. (AIR Aizawl)
