17 Dec 2023: Mamit-ah burger eisual vangin mi engemawzah Mamit district hospital-ah enkawl mek an ni a, an thil eisual hi ZMC-ah vawiin khan sample thawn niin naktuka zirchian tura ruahman a ni.
Kar kalta Nilaini leh Ningania Mamit Field veng bazara thingpui dawr MM Cafe-a burger ei zingah pumna, kawthalo, luak chhuak, luhai leh khawsik tlun an awm nasat avangin Mamit district Hospital ah mi 10 admit tawh an ni a. Niminah pawh damlo admit an la awm zel a, tunah hian damlo mi 8 awm mekin mi 2 te chu chhuahtir tawh an ni a. Damdawi-in pan lova mahni in lama inenkawl te pawh an awm bawk. Damlo damdawi-in a enkawl zingah hian naupang kum 5 mi pawh a tel a ni.
Burger ei te hi burger an ei atanga darkar 15 hnuah an pum nain an kua a thalo nghal a, an luak a chhuak a, an taksa a nat bakah an lu a hai a, an khua sikin an tlun nasa thei hle a ni. (AIR Aizawl)
