19 Dec 2023: MZI Hqrs Lunglei, MZP Hqrs Lunglei leh MSU Regional Hqrs Lunglei tangkawpte buatsaihin vawiin khan Lunglei khawpui chhungah Charity Mobile Concert neih a ni.
Chanhaite puala buatsaih Charity Mobile Concert hi Lunglei khawpui chhung hmun hrang hrangah neih niin Lunglei chhim lam AOC atanga tanin Zomawi Bakery bul Chanmari, JB Residence bul Chanmari, Mizofed Kawt, Tlabung Peng, State Bank bul leh Serkawnah te hun hman a ni. Heng hun an hmanna hrang hrangah hian zaithiam chi hrang hrang an zai a, College zirlai ten kawng dunga lirthei veivak leh mihring veivakte hnenah leh dawr nghakte hnenah vehbur an khawn a ni.
Charity Mobile Concert a sum hmuh ang ang te hi a bo a bang awm lovin Lunglei khawpui chhung veng hrang hranga chhungkaw khawsak harsa zual thlanchhuah te hnenah Krismas thilpek atan hlan a nih tur thu Mobile Concert buatsaihtute chuan an sawi.
MZI, MZP leh MSU te hian kum dangah pawh Krismas dawn apiangin hetiang Programme hi an lo buatsaih tawh thin a, chhungkaw harsa zual tam tak Krismas dawnah tanpuina sumfai an lo hlan tawh thin a ni. Concert buatsaihtute chuan chanhai zawkten Krismas hlim taka an hman ve theihna tura phal taka thilpek petu zawng zawngte hnenah leh lawmman nei lo va zaithiam zai zawng zawngte chungah lawmthu an sawi bawk a ni.
