26 Dec 2023: Kumin January ni 1 atanga tun thleng hian Mizoramah ruihhlo hman dik loh avangin mi 74 an thi tawh.
Excise and Narcotics department chhinchhiah danin kumina ruihhlo avanga thi zinga 62-te hi mipa an ni a, 12 chu hmeichhia an ni. Kumin hi a la tawp lo chungin kum 19 chhunga ruihhlo vanga nunna chan tam ber kum a ni.
Excise and Narcotics department hian ruihhlo vanga thi zat hi heroin vanga thi awm hmasak ber kum 1984 atangin an chhinchhiah a. Kum 1984 atanga tun thlenga ruihhlo vanga thi zat hi mi 1,810 an tling tawh a, an zinga 1,591 hi mipa an ni a, hmeichhia 219 an awm bawk. Kum 1986 khan Mizoramah ruihhlo hmansual avanga nunna chan an awm lova, hemi kum tih lohvah chuan kumtinin ruihhlo vanga thi hi an awm ziah a ni. A tir lamah heroin vanga thi deuh hlir an nih laiin 1990 atang khan nachhawkna spasmo proxyvon leh parvon spa hman sual a hluar a, hemi kum hian heroin avanga thi 3 leh proxyvon vanga thi 4 an awm a. Kum 1993, 1994 leh 1995-te khan heroin vanga thi an awm lova, proxyvon leh parvon spa vanga thi erawh an tam chho ta deuh deuh a ni.
Kum 1984 atanga vawiin thleng khan kum 2004 kha ruihhlo vanga Mizorama thi tam ber kum a ni a, mi 143 zet an thi a, hemi kum hian a hma a thih tam ber kum 2000 kuma mi 139 thi leh 2003 kuma mi 136 thi kha a rawn khum a ni. Kum 2004-a ruihhlo vanga nunna chan an tam tak em avang hian Central YMA chuan ruihhlo do puangin nasa takin beihpui an thlak a, hemi avang hian a hma kuma mi 143 an thih laiin kum 2005-ah chuan nunna chan hi mi 42-ah a tla chho ta dawrh a nih kha.
Mizo thalaite’n an hman sual nasat em em spasmo proxyvon leh parvon spa hi sorkar laipui-in siamchhuah a khap tak hnu-ah ruihhlo vanga nunna chan an tlem phah chhova. Kum 2017 atang khan proxyvon leh parvon spa vanga thi an awm ngai ta lova, thalai leh pavalai thih chhan tam ber chu heroin leh ruih theih damdawi dang a ni ta a ni.
Kum 1984 atanga heroin vanga thi hi mi 239 an tling tawh a. Proxyvon leh parvon spa vanga thi hi mi 1,161 an awm tawh a, ruih theih thil dang vanga thi chu mi 410 an awm tawh bawk. Damdawi hrang hrang tih pawlh an ni hlawm. Kum 2003 kha proxyvon leh parvon spa vanga nunna chan an tam ber kum a ni a, hemi kuma ruihhlo avanga thi mi 136 zinga mi 133 chu proxyvon leh parvon spa vanga thi an ni a. Heroin vanga thi 1 awmin 2 dang chu damdawi ruih theih dang hmansual vanga thi an ni.
Mizorama ruihhlo vanga thite hi kum 14 leh kum 58 inkar an ni ber a ni. (AIR Aizawl)
